Суу ресурстары, айыл чарба жана кайра иштетүү өнөр жайы министри Эрлис Акунбеков Кыргыз Республикасындагы Кытай Эл Республикасынын элчиси Лю Цзянпин менен жолугушуу өткөрдү.
Министрлер кабинетинин маалымат кызматынын маалыматына ылайык, жолугушууда кыргыз-кытай өнөктөштүгүнүн актуалдуу маселелери талкууланды, Кыргыз Республикасынын президенти Садыр Жапаровдун Кытай Эл Республикасынын төрагасы Си Цзиньпин менен болгон жолугушууларында жетишилген маанилүү макулдашууларга көңүл бурулду, ошондой эле жогорку деңгээлдеги эки тараптуу визиттердин жыйынтыктары каралды.
Жолугушуунун катышуучулары «Торугарт» жана «Иркештам» өткөрмө пункттары аркылуу соода операциялары жогорку деңгээлде жүргүзүлүп жатканын белгилешти.
Мындан тышкары, Кыргызстандын жана Кытайдын өкмөттөрү арасында, ошондой эле эки өлкөнүн компанияларынын арасында айыл чарба тармагында мурда кол коюлган бир нече инвестициялык долбоорлорду ишке ашыруу маселелери талкууланды.
Акунбеков Кытай менен мамилелерди чыңдоо Кыргызстандын тышкы саясатынын приоритети экенин баса белгиледи. Ал кыргыз-кытай кызматташтыгы акыркы жылдары активдүү өнүгүп жатканын айтып, эки мамлекеттин ортосундагы стратегиялык өнөктөштүктү дагы да чыңдоого үмүт артарын билдирди. ```
