Кыргыз Республикасынын премьер-министринин орун басары жана суу ресурстары, айыл чарба жана кайра иштетүү өнөр жайы министри Эрлист Акунбеков Казакстандын Кыргызстандагы элчиси Рапиль Жошыбаев менен жолугушуу өткөрдү. Бул тууралуу Кыргыз Республикасынын өкмөтүнүн билдирүүсүндө айтылган.
Жолугушуу учурунда кыргыз-казак кызматташтыгынын ар тараптуу аспекттери талкууланды. Кыргызстан президенти Садыр Жапаров менен Казакстан президенти Касым-Жомарт Токаевдин ортосунда мурда жетишилген макулдашуулардын ишке ашырылышына өзгөчө көңүл бурулду.
Тараптар эки тараптуу мамилелерди тереңдетүүгө даярдыктарын билдиришти, соода-экономикалык байланыштарга көңүл бурулду. Ошондой эле айыл чарба, инфраструктура, логистика жана суу-энергетикалык комплекс сыяктуу тармактарда долбоорлорду ишке ашырууну колдоонун маанилүүлүгү белгиленди.
Эрлист Акунбеков Кыргызстан менен Казакстандын стратегиялык өнөктөштүгү жана союздаштык мамилелери бекем жана ишенимдүү диалогдун, ошондой эле өз ара кызыкчылык туудурган бардык маселелер боюнча натыйжалуу кызматташтыктын негизин түзөөрүн белгиледи.
Жолугушуунун соңунда эки өлкөнүн катышуусунда өтө турган жогорку деңгээлдеги иш-чаралардын графиги, ошондой эле келишимдик-укуктук базаны кеңейтүү маселелери каралды.
