Өз валютаны түзүү жана документтерди басып чыгаруу Кыргызстанда экономикалык көз карандысыздыкка жана коопсуз келечекке маанилүү кадам болуп саналат. Бул тууралуу экономист Кубан Чороев «Кабар» агенттигине берген маегинде билдирди.
Ал Кыргызстан улуттук валютанын жана негизги мамлекеттик документтердин чыгарылышы менен байланышкан маанилүү өзгөрүүлөрдүн босогосунда турганын белгиледи, бул өлкөнүн суверенитетин тастыктап турат.
Чороев бул чечимдин пайдасын баса белгилеген бир нече негизги аспектилерди белгиледи.
Ал негизги артыкчылыктар арасында чыгымдардын кыскарышын жана валюталык каражаттарды үнөмдөөнү атады.
«Мурда Кыргызстан доллар жана евро менен эл аралык компанияларга, мисалы, Франция жана Улуу Британияда сомду басып чыгаруу үчүн чоң суммада акча коротчу. Эми бул акча өлкөдө калат, бул бюджеттик каражаттарды натыйжалуу пайдаланууга мүмкүндүк берет. Ошондой эле бул чет өлкөдөн акча ташуу менен байланышкан тобокелдиктерди жоюйт», - деди ал.Мындай маанилүү документтерди, мисалы, паспортторду жана айдоочулук күбөлүктөрдү өлкө ичинде басып чыгаруу жарандардын жеке маалыматтарын коргоонун жогорку деңгээлин камсыз кылат.
«Эми биз тышкы жеткирүүчүлөргө көз каранды эмеспиз. Эл аралык сертификаттардын болушу биздин технологияларыбызды жасалмалоодон коргоп, жогорку стандарттарга жооп берерин тастыктап турат», - деп кошумчалады Чороев.
Экономист валютаны жана башка өлкөлөр үчүн документтерди басып чыгаруу мүмкүнчүлүгү Кыргызстанга жогорку технологиялык кызматтар рыногуна чыгууга мүмкүндүк берерин баса белгиледи.
«Биз башка мамлекеттерге атаандаштыкка жөндөмдүү баада сапаттуу кызматтарды сунуштай алабыз. Бул мамлекеттик бюджетке валюталык кирешелердин жаңы булагына айланат жана Кыргызстандын эл аралык аренадагы жаңы статусун символдойт. Биз керектөөчү ролунан жогорку сапаттагы технологиялык кызматтарды көрсөтүүгө жөндөмдүү өнөктөшкө өтүп жатабыз», - деп жыйынтыктады ал.
материалдын автору: Мээрим Дуйшоналиева
аударган: Гульмира Байтерекова
