Жогорку Кенештин эмгек, саламаттык сактоо, аялдар жана социалдык маселелер боюнча комитетинин жыйынында депутат Улукбек Карыбек уулу өлкөнүн түштүк регионунда Микрохирургия борборунун жоктугуна көңүл бурду.
Ал Кыргызстанда Бишкекте жайгашкан жалгыз борбор гана иштеп жатканын белгилеп, бул пациенттерди зарыл болгон дарылоону алуу үчүн борборго барууга мажбур кылып жатканын айтты.
«Ошто же болбосо бөлүм ачуу мүмкүнчүлүгү талкууланабы?», - деп сурады ал Саламаттык сактоо министрлигинин өкүлдөрүнөн.
Саламаттык сактоо министринин орун басары Айбек Маткеримов бул маселени ведомство карап чыга турганын жооп берди.
«Жылына жардам сурап кайрылган пациенттердин санын аныктоо маанилүү. Ошондой эле даярдоо керек болгон квалификациялуу кадрлардын жетишсиздигин эске алуу зарыл», - деп кошумчалады ал.
Мындан тышкары, депутат Ош облустук ооруканасынын кызматкерлеринен наркоз үчүн акча талап кылгандыгы боюнча жарандардан түшкөн арыздар тууралуу билдирди.
«Мен ошондой эле төрөт үйлөрүнүн ишине көңүл бургум келет. Биз мыйзамда төрөт жана төрөттөн кийинки дарылоо жыл ичинде акысыз болушу керек деп так жазганбыз», - деди ал.
Министрдин орун басары медициналык персонал арасында айрым адамдар бүт системага шек келтирген учурлар кездешерин, жана мындай окуяларды алдын алуу боюнча иштер жүргүзүлүп жатканын жооп берди.
