Америка Кошмо Штаттарынын президенти Дональд Трамп 200дөн ашык тамак-аш товарларына, анын ичинде кофе, сиыр эти, банан жана апельсин ширеси сыяктуу товарларга коюлган жогорулатылган бажы салыктарын жоюу чечимин кабыл алды. Бул буйрук 14-ноябрда, жума күнү, Ак үйдүн расмий сайтында жарыяланды, деп билдирет DW.
Америкалыктардын инфляция боюнча кооптонуулары
Reuters агенттиги маалымдагандай, бул демилге АКШ жарандарынын азык-түлүк бааларынын жогорулашы боюнча өсүп жаткан кооптонуулары менен байланыштуу болду. Бажы салыктарын жоюу 13-ноябрда, бейшемби күнү түнкү саат 12:00дөн баштап күчүнө кирди. Бул чечим Трамптын саясатына кескин өзгөртүү болуп, ал быйылкы жылы жогорку импорттук бажы салыктарын киргизүү менен инфляцияга жол бербегенин белгилеп келген.
14-ноябрда президенттик Air Force One учагында журналисттердин суроолоруна жооп берип жатып, Трамп салыктар "кайсы бир учурларда" баалардын жогорулашына алып келиши мүмкүн экенин моюнуна алды. Анткен менен, ал АКШда "фактически инфляция жок" экенин баса белгиледи.
Мындан тышкары, президент келерки жылы төмөн же орто кирешелүү америкалыктарга 2000 доллар төлөөнү пландап жатканын, жогорулатылган бажы салыктарынан бюджетке түшкөн каражаттарды колдонуп төлөй турганын билдирди.
