Казакстандын президенти Касым-Жомарт Токаев кыргызстандык кесиптеши Садыр Жапаровду Жогорку Кеңешке болгон шайлоонун ийгиликтүү өтүшү менен куттуктады, деп билдирет Акорда.
Президент бул шайлоо процессинин жыйынтыктары Кыргызстандын өнүгүүсүнүн стратегиялык максаттарына жетүү жолунда туруктуу жылыштарды көрсөтүп жатканын белгиледи.
«Бул парламенттик шайлоолор сиздин күчтүү жана гүлдөгөн мамлекет түзүү боюнча курсуңузга элдин колдоосун чагылдырат. Казак-кыргыз мамилелеринин стратегиялык өнөктөштүк жана достукка негизделген динамикалык өнүгүшүн көргөнүмө кубанычтамын. Көп кылымдык достук, коңшулук жана өз ара колдоо салттарына таянып, мамлекеттер аралык кызматташтыгыбызда олуттуу алдыга жылыштарга жетише алабыз деп ишенем», – деп жазган Касым-Жомарт Токаев.
Токаев Садыр Жапаровго кыргыз элинин кызыкчылыгы үчүн маанилүү ишмердүүлүгүндө дагы да ийгиликтерди каалады.
30-ноябрда Кыргызстанда Жогорку Кеңештин депутаттарын шайлоонун мөөнөтүнөн мурдагы добуш берүүсү өтүп жатат, ага 460 талапкер катышууда.
Мамлекет 30 шайлоо округуна бөлүнгөн, ар бир округдан парламентке эң көп добуш алган үч депутат шайланат.
