Берилген маалыматтарга ылайык, 2025-жылдын 18-декабрында Панфилов райондук ички иштер бөлүмүнө 1986-жылы туулган М.Т. аттуу жергиликтүү тургун кайрылган. Ал 16-декабрда саат 17:30 чамасында Каиндыдагы «Легаси» авто жуучу жайында белгисиз адамдардын эч кандай себепсиз ага жана анын бир туугандарына — 1989-жылы туулган М.Т. жана 1980-жылы туулган М.А.га кол салып, денесине жаракат келтиргенин билдирген. Андан кийин шектүүлөр окуя болгон жерден качып кетишкен.
Бул окуянын негизинде Кыргыз Республикасынын Кылмыш-жаза кодексинин 280-беренеси (Хулигандык) боюнча кылмыш иши козголду.
Тергөөнүн жүрүшүндө милиция кызматкерлери шектүүлөрдүн жеке башын аныктоого жетишишти. Алар жергиликтүү тургундар болуп чыкты: 1991-жылы туулган С.Т., 1996-жылы туулган Ж.Н. жана 1997-жылы туулган Т.А. Кыргыз Республикасынын Укук бузуулар кодексинин 96-беренесинин нормаларына ылайык, аталган адамдар кармалып, убактылуу кармоо жайына жайгаштырылды.
