Ведомствонун маалыматына ылайык, кылмыштуу топ Кыргызстан, Россия, Казакстан жана Тажикстан жарандарынын курамынан турган. Операциянын жүрүшүндө жети шектүү кармалды, ал эми топтун дагы бир мүчөсү эл аралык издөөдө жарыяланды.
Тергөөнүн маалыматы боюнча, кармалгандар Афганистанда өндүрүлгөн наркотиктерди контрабанда жана сатуу менен алектенген, жүк ташууларын Кыргызстан аркылуу өткөрүп жатышкан.
Кармалгандардын үйлөрүндө жана унааларында, ошондой эле жашыруун жайларда жүргүзүлгөн тинтүүлөрдүн натыйжасында укук коргоо органдары 136 килограмм 855 грамм наркотиктерди, анын ичинде 20 килограммдан ашык опий жана 116 килограммдан ашык гашишти тартып алды.
Мындан тышкары, операциянын жүрүшүндө доллар, сом, өзбек суму жана рубль түрүндөгү чоң суммадагы акча табылды. Ошондой эле алты унаа мамлекеттик бюджетке өткөрүлдү.
Учурда тергөө Кыргыз Республикасынын Кылмыш-жаза кодексинин 262-беренеси ("Кылмыштуу коомду түзүү же ага катышуу"), 282-беренеси ("Наркотикалык каражаттарды жана психотроптук заттарды мыйзамсыз даярдоо, сатуу максатында"), 285-беренеси ("Кыргыз Республикасынын мамлекеттик чегинен өткөрүүгө тыюу салынган буюмдарды контрабанда кылуу") жана 378-беренеси ("Кыргыз Республикасынын мамлекеттик чегин мыйзамсыз кесип өтүү") боюнча бир нече кылмыш ишин жүргүзүүдө.
