Укук коргоо органдары белгилүү коомдук ишмер Бекболот Талгарбековду кармап алышты. Бул тууралуу анын уулу Арстан Талгарбеков 24.kg сайтына берген интервьюсунда билдирди.
Арстандын айтымында, эртең менен Бишкектин 8-микрорайонундагы атасынын батирине милиция кызматкерлери тинтүү ордери менен киришкен. Текшерүү иштери аяктагандан кийин Бекболот Талгарбеков Ички иштер министрлигинин Криминалдык милициясынын Башкы башкармалыгына суракка жеткирилген.
Кармалган адамдын уулу, атасын үч укук коргоо кызматкери коштоп барганын, ал эми милициянын бир бөлүгү батирде процессуалдык иштерди жүргүзүү үчүн калганын тактады. Арстан ошондой эле суракка 75 кол койгондордун баары чакырылганын белгиледи.
Ошол эле учурда, Ички иштер министрлигинин басма сөз кызматы кармоо жана тинтүү тууралуу маалыматты четке какты, деп билдирет 24.kg.
Бекболот Талгарбеков жаңы президенттик шайлоолорду өткөрүүнү талап кылган коллективдик кайрылуунун бириничи инициатору болуп саналат. Бул документти илим өкүлдөрү, мурдагы премьер-министрлер, экс-депутаттар жана башка коомдук ишмерлердин 75 өкүлү кол койгон.
Мурда президенттин басма сөз катчысы Садыр Жапаровдун бөлүнүүгө жол бербөө тууралуу сөздөрү Камчыбек Ташиевге эмес, Бекболот Талгарбеков, Эмилбек Узакбаев жана башка фигураларга тиешелүү экенин билдирген.
