Документте ишкананын складдарында 8,4 миллион сомдук негизги каражаттар жана материалдык активдер бар экендиги тууралуу маалымат берилген. Бул сумма ичинен 3 миллион 420,9 миң сом негизги каражаттарды, ал эми 4 миллион 979,1 миң сом материалдык баалуулуктарды түзөт.
Отчет ошондой эле Кыргыз Республикасынын Счеттук палатасынын сунуштарына карабастан, «Бишкекводоканал» балансында турган үч унаа мэриянын жана БГКнын кызматкерлеринин муктаждыктары үчүн тиешелүү документтерсиз колдонулганын баса белгилейт. 2023-жылы бул унааларга болгон жалпы чыгымдар 2 миллион 109,9 миң сомду түзүп, анын ичинен 1 миллион 385,6 миң сом айдоочулардын айлык акысына, 724,3 миң сом болсо башка чыгымдарга жумшалган.
Мындан тышкары, отчетто «Бишкек шаарынын суу берүү жана канализация системаларын реабилитациялоо (II фаза)» долбоорунда көзөмөлдөө өлчөмдөрү учурунда подрядчик ОсОО «Технотоп» жумуштун көлөмүн 39,02 миң сомго көбөйтүп алгандыгы тууралуу маалымат айтылган.
