Жол кырсыктарына алып келүүчү негизги факторлордун арасында ылдамдыкты ашыруу, туура эмес маневрлер, обгон учурунда каршы тилкеге чыгуу, унааны алкогольдик мас абалда башкаруу, ошондой эле кесилиштерде артыкчылыкка көңүл бурбоо жана жол белгилерин, аралыкты эске албоо белгиленет.
Ички иштер министринин орун басары Октябрь Урмамбетованын, Ички иликтөө кызматынын начальниги Улан Бийбосуновдун жана Жол кыймылынын коопсуздугун камсыздоо башкы башкармалыгынын начальниги Азенбек Козукеевдин катышуусунда өткөн оперативдик жыйындын жүрүшүндө жыл ичинде жасалган иштердин жетишкендиктери жана кемчиликтери талкууланды.
Жыйында иш-чараларды пландоодо жаңы ыкмаларды жаңыртуунун зарылдыгына көңүл бурулду, бул мурдагы стратегияларды кайталабоо жана заманбап талаптарга ылайыкташуу үчүн маанилүү. Мындан тышкары, коомчулуктун дайым көңүл борборунда турган жол кыймылы инспекторлорунун сапаттуу кызмат көрсөтүүсүнүн маанилүүлүгү белгиленди. Жыйынынын катышуучуларына санариптештирүү жана жергиликтүү бийлик органдары менен өз ара аракеттешүүнү күчөтүү боюнча активдүү иш алып баруу тапшырылды.
Ошондой эле, жыйындын катышуучулары таксисттерге лицензия берүү боюнча көзөмөлдү күчөтүү жана жол кырсыктарын алдын алуу боюнча кошумча чараларды кабыл алуу зарылдыгын белгилешти.
Жыйындын жыйынтыгы боюнча кызматтык ишмердүүлүктө аныкталган кемчиликтерди жоюу боюнча көрсөтмөлөр берилди жана бир катар кызматкерлерге дисциплинардык чаралар колдонулду.
