«Кытай – Кыргызстан - Өзбекстан» темир жол долбоорун ишке ашыруу учурунда 19-январда Кыргыз Республикасынын Транспорт жана байланыш министринин орун басары Алмаз Тургунбаев курулуш иштерин текшерди. Анын ичинде, ал «Кытай – Кыргызстан – Өзбекстан» биргелешкен компаниясынын административдик имаратын куруу процессин карап чыкты.
Ведомствонун маалыматына ылайык, визит учурунда катышуучулар курулуш-монтаждоо иштеринин учурдагы этаптары, долбоордук чечимдерге ылайыктыгы, ошондой эле белгиленген мөөнөттөрдүн жана курулуш нормаларынын сакталуусун текшеришти.
Коопсуздук маселелерине, инженердик инфраструктуранын абалына жана объекттин кийинки этапка өтүүгө даярдыгына өзгөчө көңүл бөлүндү.
Мындан тышкары, аталган темир жолдун курулушу боюнча кезектеги жумалык жыйындын алкагында пайда болгон көйгөйлөр талкууланып, алардын чечүү жолдору сунушталды.
