Кредиттик келишимге кол коюу аземине Кыргызстандын Министрлер кабинетинин төрагасынын орун басары жана суу ресурстары, айыл чарба жана кайра иштетүү өнөр жайы министри Бакыт Торобаев катышты.
Келишим «Кытай – Кыргызстан – Өзбекстан» темир жол компаниясы менен Кытайдын мамлекеттик өнүктүрүү банкы жана Эксимбанкынан турган банктар синдикатынын ортосунда түзүлгөн.
Долбоордун жалпы баасы 4,7 миллиард долларды түзөт, анын ичинен 2,3 миллиард доллар Кытай тараптан 35 жылдык узак мөөнөттүү кредит түрүндө берилет. Кредитти төлөө долбоордук компания тарабынан жүргүзүлөт, ал эми калган 2,3 миллиард доллар өлкөлөр арасында бөлүштүрүлгөн уставдык капиталга инвестицияланат: Кытай 51% алса, Кыргызстан жана Өзбекстан 24,5% алышат.
Иш-чарада Бакыт Торобаев инвестициялык келишимдин маанилүү шарттарына ылайык, Кыргызстандын Министрлер кабинети менен Биргелешкен долбоордук компаниянын ортосунда кол коюлган келишимдин негизинде, толук финансылык камсыздоо 2025-жылдын 20-декабрына чейин аякталышы керек болчу, бирок бул милдеттемелер мөөнөтүнөн мурда аткарылды деп белгиледи.
«Бул окуя жогорку баага татыктуу жана Биргелешкен долбоордук компаниянын ири эл аралык долбоорлорду ишке ашырууга даярдыгын көрсөтөт», — деп кошумчалады ал.
«Кытай – Кыргызстан – Өзбекстан» темир жол компаниясынын башкы директору Чжоу Син долбоордук компания тартылган каражаттарды натыйжалуу пайдаланууга жана келишимдин бардык шарттарын мөөнөтүндө аткарууга көңүл бура турганын билдирди.
«Кытай – Кыргызстан – Өзбекстан» темир жолун куруу региондогу эң татаал инфраструктуралык долбоорлордун бири болуп эсептелет, ал 50 көпүрө жана 29 тоннелди камтыйт, жалпы узундугу 120 чакырымды түзөт. Бул маршруттун 40% көпүрөлөр аркылуу жана тоннелдерден өтөт, ал эми Кыргызстандын аймагында темир жолдун узундугу 304 чакырымды түзөт.
Курулуштун расмий башталышы 2024-жылдын 27-декабрында үч өлкөнүн президенттери тарабынан берилди. Ошол учурда Садыр Жапаров, Си Цзиньпин жана Шавкат Мирзиёев бул долбоордун регионалдык интеграцияны жана экономикалык өз ара аракеттенүүнү өнүктүрүү үчүн стратегиялык маанисин белгилешти. ```
