Кыргыз Республикасынын Транспорт жана байланыш министрлигинин маалымат кызматынан үч өлкөнүн өкүлдөрү «Кытай-Кыргызстан-Өзбекстан» темир жол долбоорун ишке ашыруу боюнча жолугушуу өткөрүлгөндүгү маалымдалды.
Иш-чарага Кыргызстандын транспорт министри Абсаттар Сыргабаев, Өзбекстандын транспорт министри Илхом Махкамов жана Кытайдын атайын өкүлдөрү катышты.
Жолугушуунун катышуучулары долбоордун учурдагы абалын талдап, темир жолдун курулушу активдүү стадияга өткөнүн белгилешти. Абсаттар Сыргабаев долбоорду белгиленген мөөнөттө аяктоонун маанилүүлүгүнө көңүл бурду жана Кыргызстан ишти тездетүү үчүн зарыл колдоону көрсөтүүгө даяр экенин билдирди.
Учурда тоннелдерди казуу жана убактылуу инфраструктураны куруу боюнча иштер жүргүзүлүүдө, ошондой эле уюштуруу жана административдик иш-чаралар өткөрүлүүдө.
«Кытай-Кыргызстан-Өзбекстан» темир жол долбоорун ишке ашыруу Кыргызстандын гана эмес, бүт регион үчүн да маанилүү экенин белгилеп өтүү керек. Бул жүк ташуулар үчүн аралыкты кыскартууга, транзиттик мүмкүнчүлүктөрдү жогорулатууга, жаңы жумуш орундарын түзүүгө жана өлкөлөр ортосундагы экономикалык кызматташтыкты жаңы деңгээлге чыгарууга мүмкүндүк берет.
