Кыргызстандын Билим берүү министрлиги 12 жылдык билим берүү системасына өтүү процессинде жаңы муундагы окуу китептеринин авторлорун жана иштеп чыгуучуларын тандоо үчүн конкурс уюштурду.
Министрликтин маалымат кызматынан такталгандай, бул конкурс эки этапта өтүп, үч предметти камтыды: "Кыргыз тили" (1–12-класстар үчүн), "География" жана "Тарых" (7–12-класстар үчүн).
Биринчи этапта катышуучулар өз резюмелерин сунушташты, алар адистештирилген комиссия тарабынан профессионалдык тажрыйбасы жана илимий-методикалык иштерин эске алуу менен бааланды.
Экинчи этапта талапкерлер белгиленген критерийлер боюнча иштелип чыккан долбоорлорун оффлайн жана онлайн форматта презентация түрүндө сунушташты.
Иш-чаранын жыйынтыгы боюнча:
- "География" предмети боюнча 10 арыз берилди, анын ичинен 10 автор тандалды;
- "Тарых" предмети боюнча 16 арыз келип түштү, 8 автор тандалды;
- "Кыргыз тили" предмети боюнча 24 арыз сунушталды, натыйжада 5 автор тандалды.
Эскерте кетсек, авторлорду тандоо боюнча конкурс 2025-жылдын 10-октябрында жарыяланган.
