Кеңешмеде ушул бала бакчанын имаратынын абалы боюнча маселе да көтөрүлдү. Тургундардын маалыматы боюнча, анда капиталдык ремонт 1969-жылдан бери жүргүзүлгөн эмес.
Ата-энелердин кызыкчылыгын билдирген аялдардын бири: «Биз №39 «Күн Нуру» бала бакчасын быйылкы жылдын ремонт планына киргизүүнү суранабыз. Фасад жана чатыр абдан жаман абалда, экинчи кабаттан суу агып жатат. Абал критикалык», - деди.
Жарандардын кайрылуусуна жооп берип, Ош шаардык билим берүү башкармалыгынын начальниги Тынчтыкбек Досмуратов имараттын абалы боюнча маселелерден кабардар экенин билдирди. «Биз бул бала бакчанын абалы менен таанышпыз жана мэрияга аны быйылкы жылдын ремонт планында карап чыгуу боюнча сунуш жөнөттүк. Бирок акыркы чечим мэрия тарабынан кабыл алынат. Эгер бала бакча планга киргизилсе, ремонт жүргүзүлүшү мүмкүн», - деп кошумчалады Досмуратов.
