Сосновка жана Арал постторунда транспорт каражаттарынын кыймылы убактылуу токтотулду. Жолду тазалоо боюнча активдүү иштер жүргүзүлүүдө.
17-февралда саат 12:10да Бишкек–Ош автожолунда жайгашкан Чычкан капчыгайында эки жерден кар лавиналары түшкөн. Ошондуктан Сосновка жана Арал өткөрмө пункттарында бардык транспорт каражаттары үчүн убактылуу чектөөлөр киргизилди.
Алдын ала маалыматтар боюнча, лавиналардын бири болжол менен 100 метр узундукта жана 5 метр бийиктикте. Окуянын кесепеттерин жоюу үчүн атайын техника тартылган, ал эми жолду тазалоо №23 жол эксплуатациялык ишканасы тарабынан жүргүзүлүүдө.
Транспорт жана байланыш министрлигинин басма сөз кызматы жолду тазалоо иштери активдүү режимде улантылып жатканын жана кошумча маалымат кийинчерээк берилерин маалымдады.
Министрлик айдоочуларды коопсуздук чараларын сактоого жана убактылуу чектөөлөргө түшүнүү менен мамиле кылууга чакырды.
Басма сөз кызматынын сүрөтү
