Жалал-Абад облусунда Кербен участогу Аксы РЭС жана Үч-Терек участогу Токтогул ОЭС үчүн заманбап стандарттарга жооп берген жаңы административдик имараттар куруу пландалууда, деп билдирет Жалал-Абад ПЭС. Курулуш жумуштары 2026-жылдын мартында башталып, ошол эле жылдын ноябрында аяктайт. Жалпы финансылык сумма 16 миллион сомду түзөт, бул акча ОАО «НЭСК» бюджетинен бөлүнөт.
Бул эки жаңы имаратты куруу идеясы Жалал-Абад электр тармактары тарабынан сунушталып, 2026-жылга пландын катарына киргизилген. Учурда тендер жарыялоо жана долбоордук чечимдерди тактоо, уюштуруу иш-чаралары жүрүүдө.
Жаңы административдик имараттарды куруу кызматкерлер үчүн ыңгайлуу шарттарды камсыз кылып, кардарларды тейлөөнүн сапатын жакшыртат жана энергетика тармагынын техникалык базасын бекемдөөгө көмөктөшөт.
Ошондой эле, өткөн жылы Чаткал РЭС үчүн жаңы эки кабаттуу административдик имараттын курулушу башталганын белгилеп өтүү керек. Жумуштардын аякташы жана пайдаланууга берилиши ушул жылдын июнунан кечикпей болот. Мурдагы Чаткал РЭС административдик имараты дарыянын жээгинде жайгашып, авариялык абалда болгон. ```
