Жогорку Кенештин финансылар, бюджет жана ишкердик боюнча комитетинин жыйынында депутат Жумабек Салымбеков электр энергиясын пайдаланууда 3-5 кВт.ч чектөөлөрдү алуунун мөөнөттөрү боюнча суроо көтөрдү. Ал үйдөн иштеген чакан бизнес өкүлдөрүнүн, учурдагы чаралардан улам кыйынчылыкка туш болуп жаткандарын белгиледи. Анын пикиринче, мындай чектөөлөр Бишкекте жана өлкөнүн башка аймактарында бизнеске терс таасир этүүдө.
Бул боюнча энергетика министринин орун басары Насипбек Керимов чектөөлөрдү токтотуу чечими күз-кыш мезгили аяктагандан кийин, электр энергиясын пайдалануу режимин жана көлөмдөрүн талдоо негизинде кабыл алынарын түшүндүрдү.
«Учурда түнкү температуралар терс болуп турат. Биз март жана апрель айларынын жыйынтыктары боюнча чектөөлөрдү алуу маселесин карай алабыз, бирок так даталарды азырынча айта албайм», - деп кошумчалады Керимов.
