КРда «Э-Күндөлүк» автоматташтырылган маалыматтык системасынын алкагында жаңы «Мектеп тамактануусу» модулун тестирлөө өткөрүлдү. Бул тууралуу Билим берүү министрлигинин маалымат кызматынан билдиришти.
Билим берүү министрлигинин санариптик өнүгүү боюнча орун басары Лира Самыкбаева жетекчилик кылган жыйынга «Улут Софт» ЖЧКнын адистери, Россиянын тармактык тамактануу институтунун (SIFI) өкүлдөрү, ошондой эле Бишкектеги Т.Молдо атындагы №71 интернат мектеби жана №64 жалпы билим берүү мектебинин өкүлдөрү, Октябрь районунун билим берүү башкармалыгынын тамактануу бөлүмүнүн кызматкерлери катышты.
Жыйын учурунда жаңы модулдун функционалдык мүмкүнчүлүктөрү талкууланып, анын билим берүү мекемелеринде колдонулушун жакшыртуу жана системаны практикалык талаптарга ылайыкташтыруу боюнча идеялар сунушталды. Катышуучулар мектеп тамактануу тармагына санариптик чечимдерди киргизүү билим берүү системасын өнүктүрүү үчүн маанилүү кадам экенин белгилешти.
Лира Самыкбаева «Мектеп тамактануусу» модулун ишке ашыруу мектептерде тамактанууну пландоодо, эсептөдө жана көзөмөлдө ачыктыкты жана натыйжалуулукту камсыз кылууга мүмкүндүк берерин баса белгиледи. «Санариптештирүү кызматкерлердин административдик жүгүн азайтууга, алардын жумушун жеңилдетүүгө жана балдардын сапаттуу жана коопсуз тамактануусу үчүн шарттарды түзүүгө жардам берет. Система билим берүү мекемелеринин реалдуу муктаждыктарын эске алуу менен иштелип чыгышы маанилүү», - деп кошумчалады ал.
