Эл аралык иштер, коргоо, коопсуздук жана миграция боюнча комитеттин жыйынында 2024–2025-жылдар аралыгында Кыргыз Республикасынын Екатеринбург шаарындагы Генералдык консулдугунун иши талкууланды.
Маалымат менен генералдык консул Максат Тентимишов чыгып сүйлөдү.
Анын айтымында, консулдук каттоодо 14 730 Кыргызстандын жараны турат.
Ал белгилегендей, актуалдуу маселелердин катарында айрым жарандардын миграция мыйзамдарын бузуу учурлары, айрым административдик процедураларды ишке ашыруудагы кыйынчылыктар жана соттолгон жарандарды мекенине кайтаруу боюнча маселелердин узак мөөнөттө каралышы калууда.
Доклад угулгандан кийин депутаттар бир катар суроолорду көтөрүп, жарандардын укуктарын жана кызыкчылыктарын коргоонун маанилүүлүгүн, өзгөчө эмгек мигранттарына юридикалык жана кеңеш берүү жардамын көрсөтүү аркылуу белгилешти.
Депутаттар Гуля Кожокулова, Медина Кайрылбекова жана Жылдыз Садырбаева Кыргызстандыктар арасында Россия Федерациясынын миграция жана эмгек мыйзамдарынын талаптары боюнча маалыматтык-просветительдик иштерди жогорулатуу зарылдыгын белгилешти.
Комитеттин төрайымы Эльвира Сурбалдиева жумуш берүүчүлөр тарабынан жарандардын эмгек укуктарын бузуу учурларында консулдуктун аракеттери тууралуу кызыкты. Генералдык консул Тентимишов 24 Кыргыз Республикасынын жаранына жумуш берүүчүлөрдөн акча компенсацияларын алуу боюнча жардам көрсөтүлгөнүн, ошондой эле кыргызстандыктарды легалдуу жумушка орноштуруу маселелери боюнча жумуш берүүчүлөр менен жолугушуулар өткөрүлүп жатканын билдирди.
Мындан тышкары, депутаттар пенитенциардык мекемелерде жаткан кыргызстандыктар менен иштөө, жарандардын кайрылууларына ыкчам жооп берүү жана консулдук жана юридикалык колдоо көрсөтүү маселелерин талкуулашты.
