Бүгүн, 17-мартта, Кыргыз Республикасынын билим берүү министринин орун басары Надира Жусупбекова Япониянын Эл аралык кызматташтык агенттигинин (JICA) Кыргызстандагы өкүлдөрү менен жолугушту. Бул тууралуу министрликтин маалымат кызматынан билдиришти.
Жолугушуунун жүрүшүндө угуу жана сүйлөө мүмкүнчүлүгү чектелген жаштардын лидерлик жөндөмдөрүн өнүктүрүү боюнча демилгелер жана алардын социалдык интеграциясы боюнча чаралар талкууланды. Бул программа алкагында 18 жаштан жогорку адамдар үчүн окутуу тренингдери уюштурулган, ошондой эле эң активдүү катышуучуларды Японияга стажировкага жиберүү пландалууда.
Министрдин орун басары өлкөдө инклюзивдүү класстарды түзүү, мугалимдер үчүн атайын программаларды киргизүү жана оор оорулары бар балдар үчүн онлайн окутууну уюштуруу боюнча активдүү иштер жүргүзүлүп жатканын белгиледи.
Жолугушуунун жыйынтыгында эки тарап кызматташтыкты улантууга жана Кыргызстанда инклюзивдик билим берүүнү өнүктүрүү боюнча биргелешип иштөөгө даяр экенин билдиришти.
