Кыргыз Республикасынын энергетика министри Таалайбек Ибраев Индияда өтүп жаткан Bharat Electricity Summit 2026 эл аралык форумуна катышууда.
Саммиттин жүрүшүндө ал министрлер панелинде сөз сүйлөп, жаңылануучу энергия булактарын интеграциялоо, энергетикалык системаларды модернизациялоо жана энергетика тармагында регионалдык кызматташтыкты өнүктүрүү маселелерин талкуулады.
Сөзүндө Ибраев жаңы энергетика формаларына өтүүнүн негизги чакырыктарынын бири жаңылануучу энергия булактарынын үлүшүнүн көбөйүшү шартында энергетикалык системаларда ийкемдүүлүктү камсыз кылуу зарылдыгына көңүл бурду. Ал ошондой эле тармактык инфраструктураны модернизациялоонун, энергияны сактоочу системаларды өнүктүрүүнүн жана заманбап балансировка ыкмаларын киргизүүнүн маанилүүлүгүн белгиледи.
Мындан тышкары, министр регионалдык интеграциянын маанилүүлүгүн, ал энергетикалык системалардын туруктуулугун жогорулатууга, электр энергиясынын жетишсиздигинен келип чыккан коркунучтарды азайтууга жана ресурстарды оптималдаштырууга жардам берерин айтты.
Кыргыз Республикасынын Bharat Electricity Summit 2026га катышуусу өлкөнүн дүйнөлүк энергетикалык күн тартибине активдүү катышуусун белгилейт жана эл аралык кызматташтыкты бекемдөөгө, инвестицияларды тартууга, алдыңкы технологиялар менен алмашууга жана туруктуу энергетикалык чечимдерди илгерилетүүгө багытталган.
