2025-жылы Кыргызстандан жумушчу миграция агымы 170 миң адамды түздү. Бул маалыматты чет өлкөдөгү жарандарды жумушка орноштуруу борборунун жумушчу миграция башкармалыгынын жетекчиси Эсенбек Эргешов Биринчи радиодо билдирген.
Анын маалыматы боюнча, болжол менен 25 миң мигрант борбордун жана жеке агенттиктердин жардамы менен жумуш тапкан: 5 500 адам борбор аркылуу жана 19 500 адам агенттиктер аркылуу.
«Бул жалпы мигранттардын 15%ын гана түзөт. Калган 85% өз күчүнө, тааныштарына жана ооздон-оозго маалыматка таянып өз алдынча кетишет. Тилекке каршы, мындай адамдар көп учурда кыйынчылыктарга, анын ичинде жумушчу эксплуатациясына жана адамдарды соодалоого туш болушат. Биз болсо, өз кезегинде, биз аркылуу чыгып кеткендерди, алардын мекенине кайтып келгенине чейин, көзөмөлдөп турабыз», - деди Эргешов.
Ал ошондой эле Кыргызстанда оң тенденция байкалып жатканын кошумчалады. Эгер беш жыл мурун жыл сайын 1 миллионго жакын адам жумушка кетсе, азыр алардын көпчүлүгү өлкөдөгү социалдык-экономикалык абалдын жакшыргандыгына байланыштуу кайтып келишүүдө.
«Мурда Кыргызстан жумушчу күчүн экспорттоочу өлкө болсо, азыр биз өз аймагыбызда иштөө үчүн чет элдик жарандарды тартууга кириштик», - деп жыйынтыктады Эсенбек Эргешов.
