Чүй облусунда Жер жана суу көзөмөлдөө кызматы тарабынан жүргүзүлгөн текшерүүнүн натыйжасында айыл чарба жерлеринин максатсыз колдонулганы боюнча учурлар катталды.
Агроөнөржай министрлигинин маалымат кызматы тарабынан берилген маалыматка ылайык, Аламудун районунун Байтик айылдык аймагындагы Кашка-Суу айылында, контур №1220га тиешелүү 0,72 гектар аянттагы жайыт жеринин максатсыз колдонулганы аныкталган.
Атап айтканда, аталган аянттын ээси Б.Т.Ж. айыл чарба иши менен алектенүүнүн ордуна, бул аймакта «Картинг-Багги» аттуу эс алуу зонасын уюштурган.
Текшерүүнүн натыйжасында жаранга Кыргыз Республикасынын укук бузуулар кодексинин 239-беренесине ылайык чаралар колдонулуп, айып пул салынган.
«Мындан тышкары, жер участогун максаттуу пайдаланууга милдеттендирген буйрук берилди. Эгерде кайрадан мыйзам бузулса, Кыргыз Республикасынын Жер кодексинин 65, 66 жана 67-беренелерине ылайык чаралар көрүлөт», - деп айтылат маалыматта.
