Биздин команданын спортчулары эки алтын медаль, бир күмүш жана эки коло медаль утушту. Командалык эсепте биринчи орунду нейтралдуу статус менен катышкан Россиянын самбочулары ээлесе, экинчи орунду Казакстандын командасы алды.
Дүйнө чемпионатынын алтын медалдарын Даниэль Асеков жана Бекболот Токтогонов алышты, ал эми күмүш медаль Элхан Орозалиеге тийди. Коло медалдарды Усон кызы Акак жана Мээримай Нурадилова утушту.
«Жакында Бишкекте өткөн дүйнө чемпионаты самбо боюнча эл аралык аренада маанилүү өсүш жана универсалдуулукту көрсөттү. Биз самбо боюнча традициялык мектептердин бекемделип жатканын жана жаңы өлкөлөрдүн мелдештерге активдүү катыша баштаганын байкап жатабыз. Өзгөчө паралимпиялык самбодогу прогресс кубандырат: Иран, Монголия жана Молдованын көрүүсү начар спортчуларынын ийгиликтүү чыгыштары дүйнө чемпиону болушу самбонун бардыгына жеткиликтүү экенин тастыктайт», — деди Эл аралык самбо федерациясынын (FIAS) президенти Василий Шестаков жабылыш аземинде.
Маалымат үчүн, 7-9-ноябрда борбордо самбо боюнча дүйнө чемпионаты өтүп, анда үч дисциплина боюнча мелдештер болду: спорттук самбо, жекеме-жеке самбо жана SVI-1 классы боюнча көрүүсү начар адамдар үчүн самбо. Жалпы 31 медаль комплекттери ойнолду.
