Бишкекте ОДКБнын Коопсуздук Кеңешинин сессиясында Россиянын президенти Владимир Путин заманбап орус аскердик техникалары жана куралдары менен жоокердик күчтөрдү камсыздоо үчүн ири масштабдагы программага киришүүнү сунуштады. Бул техникалар чыныгы согуштук шарттарда өзүн жакшы көрсөттү.
Путин өз сөзүндө Россия союздаштары менен аскердик потенциалды күчөтүү үчүн активдүү кызматташууну уланта турганын белгиледи. «Негизги аракеттер улуттук контингенттердин согуштук жөндөмдүүлүгүн жогорулатууга жана жоокердик күчтөрдү башкарууну жакшыртууга багытталат», - деди ал.
Президент бул стратегиянын алкагында аскердик бөлүктөрдү жана атайын бөлүмдөрдү даярдоого багытталган бир катар биргелешкен иш-чараларды өткөрүү пландалганын айтты. Ал ошондой эле, туруктуу машыгуулар бул процесстин маанилүү бөлүгү болоорун белгиледи.
«Авиациялык күчтөрдү жана абадан коргонуу системаларын өнүктүрүүгө өзгөчө көңүл бурулат. Биз тынчтык орнотуучу күчтөрдүн иш механизмдерин жакшыртууга милдеттүүбүз. Биздин төрагалыктагы негизги багыттардын бири ОДКБнын технологиялык лидерлигин тереңдетүү жана коргонуу-өндүрүш комплекси ишканалары арасында тыгыз кызматташтыкты камсыздоо болот», - деп кошумчалады Путин.
Мындан тышкары, ал Россиянын жоокердик медицинадагы мыкты жетишкендиктерди жоокердик күчтөргө киргизүүгө даяр экенин айтты.
