30-апрель күнү Франциядан келген арфистка Енджа Атар чыгыш жасайт

Бишкекте Т.Сатылганов атындагы Кыргыз улуттук филармониясынын чоң залында 30-апрелде Франциядан келген виртуоз арфистка Енджа Атардын концерти өтөт. Чыгыш мамлекеттик филармониялык камералык оркестри менен биргеликте өтөт. Музыканттар өз программасында батыш европалык композиторлордун классикалык чыгармаларын соло арфа үчүн сунушташат.

Маалыматка ылайык, Енджа Атар Түркиянын Мамлекеттик консерваториясынын Мимар Синан атындагы Жогорку искусстволор мектебин аяктаган. Азыр Париждеги Улуттук консерваторияда (Conservatoire National Régional de Boulogne-Billancourt) Анна Рикьюборгдун жетекчилигинде соло, камералык музыка жана оркестрдик концерттер боюнча билим алууда.

«Жаш Енджа виртуоз арфистка деген наамын 5-чи Эл аралык жаш виртуоздор конкурсуна катышып, негизги сыйлыгын жеңип алгандыгы менен тастыктады. Бул конкурс Болгариядагы Любомир Пипков атындагы Улуттук музыкалык мектеп тарабынан уюштурулган. Мындан тышкары, ал көптөгөн белгилүү музыканттардын мастер-класстарына мыкты аткаруучу катары катышкан», - деп билдиришти уюштуручулар.

2012-жылы Парижде ийгиликтүү өткөн 'Opus Erasmus II' программасында Енджа Атар Эрдем Чологлу, Ахмет Алтынел, Пьер Кармелет жана Микеланджело Галати тарабынан аткарылган чыгармаларда активдүү катышкан. Ошол жылы Түркиянын Жаштар филармониялык оркестринин катышуусунда анын концерттери Түркияда жана Европада уюштурулган.