Өкмөттүн маалымат кызматынын билдирүүсүнө ылайык, Байсалов өз сөзүндө Кыргызстан үчүн жаңыланган Улуттук аныкталган салым (NDC 3.0) 2030-жылга чейин парник газдарынын чыгарылышын 18% га кыскартууга багытталганын, эл аралык коомчулук тарабынан колдоо көрсөтүлгөн учурда бул көрсөткүчтү 30% га чейин жогорулатуу мүмкүнчүлүгү бар экенин белгиледи, ошондой эле XXI кылымдын ортосуна чейин углерод нейтралдуулугуна жетүүнү максат кылууда.
Анын айтымында, төмөнкү эмиссиялуу жана тоолуу өлкө катары Кыргызстан үчүн негизги маселе эмне кылуу керектигинде эмес, климаттык максаттарга жетүү үчүн зарыл болгон ресурстарды кантип тартуу керектигинде. Адистер белгилешет, коюлган милдеттерди минималдуу натыйжалуу аткаруу үчүн жок дегенде 6 миллиард АКШ доллары талап кылынат.
Байсалов ошондой эле учурда эң аз приоритетке ээ болуп, эл аралык климаттык инициативалардын алкагында жетиштүү каржылоону албай жаткан тоо экосистемалары үчүн климаттык каржылоону камсыздоо боюнча өзүнчө глобалдык структура түзүүнү сунуштады.
Мындан тышкары, ал Париж келишиминин 6.2 жана 6.4-беренелерине ылайык келүүчү улуттук углерод соодасынын системасын иштеп чыгуу башталганын билдирип, өлкөнүн орман каптоосун 15% га чейин эки эсе көбөйтүү максатында 800 миллион дарак отургузуу боюнча улуттук инициативаны сунуштады. Бул инициатива Кыргызстанга келечекте жылына 250дөн 500 миллион долларга чейин углерод кредиттерин сатууга мүмкүндүк берет.
Саммиттин алкагында Эдиль Байсалов бир нече эки тараптуу жолугушууларды жана сүйлөшүүлөрдү өткөрүп, климаттык өнөктөштүк жана туруктуу өнүгүү маселелерин талкуулады.
