Жыйындын жүрүшүндө өкмөт башчы 2025-жылга республикалык бюджет долбооруна, ошондой эле 2026 жана 2027-жылдарга болжолдуу маалыматтарга көңүл бурду.
Касымалиев 2025-жылы өлкөнүн консолидирленген бюджети 1,1 трлн сомдон ашарын, бул тарыхый жетишкендик болорун билдирди. "Мурда бекитилген бюджет 708,8 млрд сомду түзгөн, биз учурдагы жылды 381,7 млрд сомго өсүү менен жыйынтыктап жатабыз, бул 153,8% түзөт. Ошол эле учурда 10 млрд сомдон ашык профицитти белгилеп өтөбүз", - деди ал.
Ал ошондой эле макроэкономикалык көрсөткүчтөргө токтолуп, учурдагы жылдын он айында ИДПнын 10%га өскөнүн белгиледи.
"Эл аралык валюта фондуна ылайык, Кыргызстан 2024-жылы ИДПнын эң жогорку өсүү темптери менен үч өлкөнүн катарына кирди. Мурда биз 9% көрсөткүчү менен бештиктин катарына киргенбиз. Бюджет мыйзамында жазылган ИДПнын көлөмү 1 трлн 624 млрд сом, ал эми 10 айдын жыйынтыгы боюнча 1 трлн 427 млрд 359 млн сомго жетти. Жылдын аягына чейин ИДП 1 трлн 779 млрд сомго чейин өсөт, бул пландан 155,6 млрд сомго көп. Экономиканын бардык секторлору оң натыйжаларды көрсөтүүдө, атап айтканда, курулушта орточо өсүү 42,8%ды түздү. 2025-жылы адам башына ИДП 2 616 долларга коюлган, ал эми жылдын жыйынтыгы боюнча 2 770 доллар болжолдонууда, бул 154 долларга көп", - деп кошумчалады ал.
Касымалиев ошондой эле Кыргызстандагы эл аралык резервдер 2025-жылдын октябрь айынын аягына карата дээрлик 8 млрд долларды (7 млрд 955,10 млн доллар) түзгөнүн, бул 2024-жылдын октябрь айы менен салыштырганда 3 млрд 20,34 млн долларга көп экенин белгиледи.
Өкмөт башчы дүйнөлүк экономикадагы абалды кыскача комментарийлеп, 2025-жылдын 1-декабрына карата өсүү темптеринин төмөндөп жатканын белгиледи. Анын айтымында, саясий туруктуулук жана дүйнөдөгү соода конфликттерине карабастан, Кыргызстан экономикасы оң тенденцияларды көрсөтүүдө жана туруктуулугун сактап турат.
Жыйындынын жыйынтыгы боюнча республикалык бюджетке өзгөртүүлөрдү киргизүү чечими кабыл алынды, бул Министрлер Кабинетинин макулдугун алды.
