Быйылкы жылдын ноябрь айында ЮНЕСКОнун адамзаттын материалдык эмес маданий мурастарынын репрезентативдик тизмесине киргизүү үчүн Казакстан менен биргеликте «Юрт жасоонун салттуу билими» аттуу номинация каралат. Бул тууралуу Кыргызстандын ЮНЕСКО боюнча улуттук комиссиясынын жооптуу катчысы Эльнура Корчуева билдирди.
«2015-жылы биз кыргыздын кок-бору ат оюну жана Казакстан менен биргеликте айтыштын искусствосун карап чыгууга сунуштайбыз», - деди Эльнура Корчуева.
Ошондой эле, анын айтымында, келерки жылы Кыргызстан Шах-Фазиль мавзолейин жана Чүй өрөөнүндө жайгашкан башка тарыхый объектилерди дүйнөлүк маданий жана табигый мурастар тизмесине киргизүү үчүн арыз берүүнү пландап жатат.
Азыркы учурда ЮНЕСКОнун тизмесинде Кыргызстандын 7 маданий жана материалдык эмес мурас объектиси бар. 2008-жылы - «Сулайман Тоо» ыйык тоосу жана кыргыз эпосторунун акындарынын искусствосу. 2009-жылы 6 өлкө - Кыргызстан, Азербайжан, Индия, Казакстан, Пакистан, Түркия жана Өзбекстан менен биргеликте Нооруз майрамы тизмеге киргизилген. 2012-жылы Кыргызстандан шашылыш коргоого муктаж материалдык эмес маданий мурастар тизмесине кыргыздын жүндөн токулган «Ала-кийиз» жана «Шырдак» кирген. 2013-жылы уюмдун тизмесине кыргыз эпикалык трилогиясы «Манас, Семетей жана Сейтек» киргизилген.
Быйыл ЮНЕСКОнун коргоо тизмесине Невакет (Кызыл суу), Суяб (Ак-Бешим), Баласагун (Бурана) орто кылымдык шаарчалары транснационалдык номинация «Жибек жолу»: «Тянь-Шань коридорунун баштапкы бөлүгү жана маршруттар тармагы» боюнча Казакстан, Кытай жана Кыргызстандан киргизилген.
Эзиз: K-News
