Тантаналуучу иш-чарада Ош шаарынын мэри Женишбек Токторбаев, Казакстан Республикасынын маданият жана маалымат министри Аида Балаева, ошондой эле вице-мэрлер жана жергиликтүү тургундар катышты.
Абай Кунанбаевдин ысымы берилген көчөнүн узундугу 4 километрди түзөт. Анын урматына эстелик орнотулуп, тегеректеги аймакты көрктөндүрүү иштери жүргүзүлгөн. Ошондой эле акындын маданий мурасын арнаган музей ачылды.
Аземде сүйлөгөн мэр Токторбаев кыргыз жана казак элдери арасындагы бир туугандык байланышты белгилеп, бул күндү маанилүү деп атады.
«Бүгүн биз кыргыз-казак мамилелери үчүн тарыхый мааниге ээ болгон күнү чогулдук. Бул жөн гана көчөнүн ачылышы эмес, эки элдин көп кылымдык достугун жана маданий биримдигин символдойт. Биз Ош шаарындагы жаңы көчөгө улуу акын А. Кунанбаевдин ысымын беребиз», - деди ал.
Галерея: Ошто казак акыны Абай Кунанбаевге арналган эстелик жана музей ачылды.
Turmush 10-сентябрда маалымдагандай, шаардык кеңештин сессиясында 37 депутат Волгоградская көчөсүн кайра аталышына колдоо көрсөттү, каршы добуш берген эч ким болгон жок.
Жаңы көчө казак акыны Абай Кунанбаевдин ысымын алат деп белгиленди.
Галерея: Ош шаардык кеңешинин сессиясы. 10-сентябрь 2025-жыл
Мурда Turmush маалымдагандай, 27-августта Ошто Волгоградская көчөсү капиталдык ремонттон кийин ачылган.
«Көчөнүн узундугу 2 километр 200 метр, туурасы — 22 метр. Бардык тротуарлар бүтөт. Көчө Гапар Айтиева көчөсүн жана Осмонов көчөсүн бириктирет. 100 километр жолдун курулушу 20-октябрга чейин аяктайт», - деп кошумчалады мэр.
Маалыматка ылайык, Ош шаарындагы жолдордун курулушу республикалык бюджеттен 2 миллиард сом өлчөмүндө каржыланууда. Бул каражаттар дагы жети ири көчөнү оңдоого жумшалат.
Галерея: Ошто Волгоградская көчөсү оңдолду.
Мэриянын маалымат кызматына ылайык, Волгоградская көчөсүнө Абай Кунанбаевдин ысымы берилет жана ушул улуу акын жана ойчулга эстелик орнотулат.
26-августта мэр Женишбек Токторбаев Ошто Казакстандын башкы консулу Мухтар Карибаевге көчөнү көрсөттү.
