Берилген маалыматка ылайык, 2025-жылы райондун аймагында 108 өрт катталган. 15 күндүн ичинде (1-декабрдан 15-декабрга чейин) райондо 6 өрт болгон. Алардын бешөө жылуулук мезгилинде мештердин жана түтүкчөлөрдүн бузулушу себептүү пайда болгон. Ошондуктан кышкы мезгилде өрттөрдүн алдын алуу жана өрт коопсуздугунун эрежелерин сактоо боюнча түшүндүрүү иштери жүргүзүлүүдө.
Өзгөчө кырдаалдар бөлүмү кышкы мезгилде жылуулук жабдыктарын, мештерди жана электр жабдыктарын колдонуу себептүү өрт чыгуу коркунучу жогорулаарын эскертет.
Мындай кырдаалдардын алдын алуу үчүн өрт коопсуздугунун талаптарын жана эрежелерин так сактоо керек:
— текшерилген жана иштеп жаткан мештерди жана түтүкчөлөрдү гана колдонуу;
— жылуулук мезгили башталгандан мурун түтүкчөлөрдү кочкулдан тазалоо;
— мештерди көзөмөлсүз калтырбоо жана алардын отун жагуусун балдарга тапшырбоо;
— мештерди жагууда бензин, керосин жана башка оңой күйүүчү суюктуктарды колдонбоо;
— уктаардан 2–3 саат мурда мештерди күйгүзүүнү токтотуу;
— отунду жана көмүрдү мештерден коопсуз аралыкта сактоо;
— электр жабдыктарын колдонууда сертификатталган жана иштеп жаткан заводдук жабдыктарды гана колдонуу;
— өз колуң менен жасалган электр жылыткычтарды колдонбоо;
— электр тармагын жүктөбөөгө аракет кылуу, мүмкүн болсо розеткаларды жана узарткычтарды колдонбоо.
Бул чараларды сактоо өрт чыгуу коркунучун азайтууга жана кышкы мезгилде коопсуздукту камсыз кылууга жардам берет.
