Turmush агенттигинин кабарчысы менен болгон маегинде ал мектептеги иш тажрыйбасы менен бөлүштү, ал жерде өзү да окуган. «Мен 1988-жылы төрөлгөм. Киров гимназиясын аяктагандан кийин Ысык-Көл мамлекеттик университетинин физика-техникалык факультетине тапшырдым. Балалыгымда дарыгер болуп, ак халат кийүүнү кыялданчумун. Бирок, Жалпы республикалык тестирлөөдөгү жыйынтыктардын негизинде физика мугалими болуп калдым. Окуудан кийин өзүмдүн туулуп-өскөн мектебиме кайтып келип, менин билим берген мугалимдерим менен иштеп жатам», - дейт Айсулуу.
Көпчүлүктү таң калтырганы, ал эки жерде иштеп, көп балалуу эне болууну кантип бириктирип жаткандыгы. «Менин беш балам бар: улуусу 9 жашта, кичүүсү - бир жарым жашта. Көбүнчө декреттик отпускка чыкпайм жана төрөттөн кийин дароо өз милдеттериме кайтып келем. Мектептен тышкары Ак-Суй райондук балдар билим берүү борборунда да сабак берем. Көп учурда: «Сен баарын кантип үлгүрөсүң?» деген суроону угам. Менин ишим так илимдер менен байланыштуу, ошондуктан мен ар дайым убактымды так пландап алам», - деп бөлүшөт ал.
Астрономияны окутууда Айсулуу Керимбекова көптөгөн ийгиликтерге жетишти. Ак-Суй райондук билим берүү борборунда ал астрофизика бөлүмүн жетектейт. «Биздин бөлүмдө үч топтон 45 бала окутулат, алар табигый көрүнүштөргө жана космоско кызыгуу көрсөтүшөт. Алар жылдыздардын аталышы, жайгашуусу жана башка планеталардагы жашоо тууралуу көптөгөн суроолорду беришет. Биз планеталар жана жылдыздардын макетин түзүп, эл аралык конкурсларга катышып, жакшы жыйынтыктарды көрсөтөбүз. Бул жылы мен «Жылдын мугалими» конкурсуна катышып, райондук деңгээлде тандоодон ийгиликтүү өттүм», - деп кошумчалайт ал.
