Депутат Дастан Бекешев субподрядчыны тандоого байланыштуу коррупциялык тобокелдиктер боюнча өзүнүн кооптонуусун билдирди, ошондой эле мамлекеттик жана жеке ишканалардын ортосундагы өз ара аракеттенүү маселелерин белгиледи.
Талкуу учурунда депутат Суйунбек Омурзаков мамлекеттик сатып алуулар жөнүндө мыйзамдын 2-беренесинин 5-пунктуна ылайык, бул мыйзамга өзгөртүүлөрдү жылына бир жолу гана киргизүүгө болорун тактады.
Депутат Кундузбек Сулайманов сунушталган өзгөртүүлөрдү колдоп, бул демилге мамлекеттик сатып алууларды жүргүзүүдө республикалык жана жергиликтүү деңгээлдерде бюджеттик каражаттарды натыйжалуу жана рационалдуу пайдаланууга багытталганын белгиледи.
Депутат Медербек Алиев сунушталган өзгөртүүлөр заманбап талаптарга жооп берерин айтты. Ал ошондой эле тендерлерди өткөрүү процессинде сатып алуучу уюмдар көп учурда төмөн бааларга көңүл бурарын, бул болсо сатып алынган товарлардын, иштердин жана кызматтардын сапатына терс таасирин тийгизерин кошумчалады.
Мыйзам долбоорунун максаты мамлекеттик сатып алуулар процессин жакшыртуу жана субподрядчыларды тандоодо тобокелдиктерди минималдаштыруу болуп саналат.
