Султаналиева белгилегендей, бул иш-чара президенттин «Улуттук рух — дүйнөлүк бийиктиктер» жана «Кыргыз элдин баа жеткис руханий мурасын — «Манас» эпосунун трилогиясын кеңири изилдөө жана жайылтуу боюнча кошумча чаралар» деген жарлыктарын ишке ашыруу алкагында уюштурулган.
Конкурс Кыргыз улуттук «Манас» театры тарабынан Билим берүү жана илим министрлиги, ошондой эле облустардагы президенттин ыйгарым укуктуу өкүлдөрү менен кызматташтыкта өткөрүлдү. Катышуучулар эл аралык деңгээлде «Манас» эпосун окууда атаандашышты. Награда тапшыруу аземи 19-январда Бишкекте өттү. Конкурстун жыйынтыгы боюнча, Панфилов району мектепке чейинки билим берүү мекемелери арасында үчүнчү орун үчүн диплом менен сыйланды. Ошондой эле «Алтын-уя», «Таалимтай», «Ширин-бөбөк», «Куш-канат», «Күн балдары» жана «Балачак» балдар бакчалары, конкурска активдүү катышкандыгы үчүн, 23-январда райондук мамлекеттик администрациядан ардак грамоталар жана акчалай сыйлыктар алышты.
Казакстан менен чектеш Курпулдок айылындагы «Алтын-уя» балдар бакчасынын жетекчиси Рахат Тентемишова жаш манасчылар арасында «Манас» эпосунун философиясын жайылтуу боюнча жүргүзүлгөн иштер тууралуу айтып берди. Ал өткөн жылдары анын тарбиялануучулары «Манас таануу» сыяктуу интеллектуалдык конкурстарда негизги сыйлыктарды утуп алышканын белгиледи. «Биз жаш таланттар аркылуу эпосубузду жайылтуу максатында «Урааным Манас» конкурсуна активдүү катышып жатабыз», - деп кошумчалады ал.
