Сүйлөшүүнүн жүрүшүндө лидерлер кыргыз-казак мамилелерине байланыштуу маанилүү маселелерди, соода, транспорт, өнөр жай кызматташтыгы, энергетика жана суу ресурстары боюнча мурда жетишилген макулдашуулардын аткарылышын талкуулашты.
Токаев Казакстанда жүрүп жаткан конституциялык реформа тууралуу айтып, өлкөдө прогрессти камсыз кылуу үчүн туруктуу негиздерди түзүүгө багытталганын белгиледи. Жапаров болсо, бул маанилүү өзгөртүүлөрдү, анын ичинде бир палаталуу парламенттин түзүлүшүн колдоп, жалпы элдик референдум өткөрүүдө ийгилик каалады.
КР президентинин администрациясынын сүрөтү.
Эки президент бардык маселелерди ишеним жана жакшы коңшулук негизинде чечүүнүн маанилүүлүгүн белгилешти, бул өз ара пайдалуу кызматташтыктын мындан аркы өнүгүшүнө шарт түзөт. Алар ошондой эле ички саясий реформалар боюнча пикир алмашышып, регионалдык жана эл аралык күн тартибиндеги маселелерди талкуулашты, ошондой эле көп тараптуу форматта биргелешкен иш-чараларды пландашты.
