Кыргыз Республикасынын тышкы иштер министри Жээнбек Кулубаев 2026-жылдын 23-февралында Женевада Швейцариянын Федералдык тышкы иштер департаментинин башчысы Иньяцио Кассис менен жолугушту. Бул жолугушуу БУУнун Адам укуктары боюнча 61-сессиясынын жогорку деңгээлдеги алкагында болду, деп билдирет КРнын Тышкы иштер министрлигинин басма сөз кызматы.
Жолугушуунун жүрүшүндө тараптар кыргыз-швейцар кызматташтыгынын маанилүү аспектилерин, анын ичинде саясий диалогдорду жана экономикалык байланыштарды, 2026-2029-жылдарга карата биргелешкен программаны ишке ашырууну жана эл аралык уюмдардагы өз ара аракеттешүүнү талкуулашты.
Жээнбек Кулубаев швейцариялык кесиптештерин 2026-жылы ОБСЕде төрагалык кылуусу менен куттуктап, бул уюмда активдүү кызматташууга даярдыгын билдирди. Эки тараптуу мамилелердеги оң өнүгүүлөрдү белгилеп, жогорку деңгээлде байланыштарды бекемдөөнүн зарылдыгын баса белгилешти. Соода жана экономикалык байланыштарды өнүктүрүү, инвестицияларды тартуу, туризм тармагында кызматташуу жана долбоорлорду биргелешип ишке ашыруу маселелери да көңүл борборунда болду.
Мындан тышкары, жолугушууда тоо региондорунун туруктуу өнүгүүсү жана актуалдуу эл аралык күн тартиби боюнча пикир алмашуу болду.
Жолугушуунун жыйынтыгы боюнча тараптар кыргыз-швейцар өнөктөштүгүн тереңдетүүгө жана жемиштүү диалогду өнүктүрүүгө болгон кызыгууларын тастыкташты.
