Ведомствонун расмий сайтында жайгаштырылган маалыматка ылайык, 2026-жылдын 27-февралында БУУнун Коопсуздук Кеңешинин комитети 1267, 1989 жана 2253 резолюцияларынын алкагында ИГИЛ жана «Ал-Каида» менен мурда байланышкан бир нече уюмду санкциялык тизмеден чыгарды.
Чыгарылган уюмдардын арасында «Хайат Тахрир аш-Шам» (Hayat Tahrir al-Sham) тобу бар, ал мурда «Фронт ан-Нусра» деген ат менен белгилүү болгон. Бул уюм 2014-жылдын 14-майында санкциялык тизмеге киргизилген, ал эми азыркы атын 2017-жылдын январь айында алган.
Тизменин чыгарылышына байланыштуу, банктар, микрофинансылык уюмдар, алмашуу пункттары жана төлөм системалары сыяктуу финансылык мекемелер, ошондой эле нотариустар, риэлторлор жана оюн операторлору сыяктуу финансылык эмес субъекттер өздөрүнүн ички маалымат базаларын жаңылап, БУУнун актуалдуу маалыматтары менен комплаенс процедураларын синхрондоштуруп турушу керек.
Санкцияларды алып салуу чечими БУУнун Коопсуздук Кеңешинин №1267, №1989, №2253 жана №2368 резолюцияларынын негизинде кабыл алынды.
Маалымат үчүн:
«Хайат Тахрир аш-Шам» (араб. «Левантты бошотуу уюму», кыскартылганы ХТШ / HTS) — исламдык багыттагы сириялык куралдуу топ.
Окуялардын хронологиясы:
2012 — «Джабхат ан-Нусра» («Жардам фронту») катары негизделген, Сириядагы жарандык согуш учурунда «Ал-Каиданын» сириялык бөлүмү.
2013 — топтун лидери Абу Мухаммад аль-Джулани ИГИЛге баш ийүүдөн баш тартты, «Ал-Каида» менен байланышта кала берди.
2014 — «Ал-Каида» менен байланышкан уюм катары БУУнун Коопсуздук Кеңешинин санкциялык тизмесине киргизилди.
2016 — «Ал-Каида» менен байланыштарды үзүү тууралуу расмий билдирүү, «Джабхат Фатх аш-Шам» деп кайра аталышы.
2017-жылдын январында — бир нече козголоңчул топтор менен бириккенден кийин «Хайат Тахрир аш-Шам» деп кайра аталышы.
2017–2024 — Сириянын түндүк-батышындагы Идлиб провинциясын көзөмөлдөө, «Куткаруу өкмөтү» деген жарандык администрацияны түзүү, анын ичинде салык системасы, полиция жана соттор.
2024-жылдын ноябрь-декабрь айлары — Башар Асаддын режиминин кулашы менен аяктаган сириялык оппозициянын ийгиликтүү чабуулун башкаруу.
2026-жылдын 27-февралы — БУУнун Коопсуздук Кеңешинин санкциялык тизмесинен чыгарылышы.
