Ош жана Жалал-Абад облустарына болгон иш сапарынын жүрүшүндө, Кыргызстандын саламаттык сактоо министринин биринчи орун басары Айбек Маткеримов Ош шаардык клиникалык ооруканасынын инфекциялык стационарын көрүп чыкты.
Визиттин негизги максаты – жугуштуу респиратордук вирустук инфекциялар жана грипп менен ооруган бейтаптарга медициналык кызмат көрсөтүүнүн уюштурулушун изилдөө, ошондой эле оорулуулардын санынын өсүшү шартында керебеттердин жүктөлүшүн баалоо болду.
Оорукананын директору Шаят Абдурахманов менен болгон жолугушууда стационарда 270 керебет бар экендиги, алардын 180и балдар үчүн, калган 90ы чоңдор үчүн арналгандыгы айтылды. Оорулуулардын санынын өсүшү менен кайрылуулар көбөйүүдө, бирок бардык зарыл медициналык жардам бейтаптарга толук көлөмдө көрсөтүлүүдө.
Ошондой эле, акыркы жылдары административдик-территориялык реформага байланыштуу шаардагы аянт жана калк саны кыйла өскөндүгү, бул болсо медициналык мекемелерге кошумча жүк жаратат жана стационарлардын убактылуу жүктөлүшүнө алып келиши мүмкүн экендиги белгиленди.
Визитинин жыйынтыгы боюнча, Айбек Маткеримов бир катар сунуштарды айтты. Анын ичинде, чоңдор үчүн альтернативдүү бөлүмдөрдө кабыл алуу уюштурулсун, ал эми инфекциялык стационар балдарга жардам көрсөтүү үчүн максималдуу түрдө пайдаланылсын деген тапшырма берди, анткени бул топ инфекциялар мезгилинде эң уязвимдүү болуп эсептелет.
Мындан тышкары, санитардык-эпидемиологиялык нормаларды сактоону күчөтүү, бейтаптарды так маршрутизациялоону камсыз кылуу, медициналык персоналдын туруктуу ишин жана көрсөтүлгөн кызматтардын сапатын контролдоо сунушталды. ```
