Тажикстандын Улуттук коопсуздук комитетинин чек ара аскерлеринин маалымат борбору республиканын аймагына афган жоочуларынын чабуулу менен байланышкан жаңы окуя тууралуу билдирди, деп маалымдайт НИАТ «Ховар».
Маалыматка ылайык, 2025-жылдын 30-ноябрында, жергиликтүү убакыт боюнча 18:45те, куралчан террорчулар тобу Афганистандын Бадахшан провинциясында жайгашкан Рузваяк айылынан чек араны кесип өтүштү. Алар Вишхарв аймагындагы Шодак айылында жайгашкан «China Road and Bridge Corporation» кытай компаниясынын кызматкерлерине чабуул жасашты.
Бул чабуулдун натыйжасында эки кытай жараны каза болду, дагы экөө жаракат алды, деп билдирет маалымат борбору.
Мындан тышкары, маалымат борбору 2025-жылдын 26-ноябрында Бадахшан провинциясынын Шахри Бузург вулусунан Шамсиддин Шохин районуна окшош чабуул болгонун белгиледи, анда «Шохин-СМ» компаниясынын үч кытайлык кызматкери каза болуп, дагы бирөө жаракат алган.
Билдирүүдө Тажикстандын коопсуздукту бекемдөө жана чек арадагы кызматташуу үчүн шарттарды түзүү боюнча аракеттерине карабастан, мамлекеттик чек арада кырдаалды дестабилизациялоого багытталган кылмыштуу топтордун аракеттери уланууда деп белгиленди.
Тажик тарап болгон окуяга терең тынчсыздануусун билдирип, мындай чабуулдарды айыптады жана Афганистандын бийлигин чек арадагы коопсуздукту камсыз кылуу жана күнөөлүүлөрдү кармоо боюнча натыйжалуу чараларды көрүүгө чакырды.
Тажикстан ошондой эле чек араларда көзөмөлдү күчөтүп, өз жарандарын жана чет өлкөлүк адистерди коргоо үчүн кошумча чараларды кабыл алууда.
Мамлекеттик чек арадагы кырдаал тиешелүү органдардын көзөмөлүндө калууда жана чабуулдарды иликтөө уланууда.
Талибдердин башкаруусундагы Афганистандын Тышкы иштер министрлиги Тажикстандын Хатлон облусундагы үч кытай жумушчусунун өлүмүн айыптады. Бул тууралуу TOLO News, Тышкы иштер министрлигинин коомчулук менен байланыш бөлүмүнүн башчысы Зия Ахмад Такалдын билдирүүлөрүнө таянып маалымдады.
Ал чабуул «региондогу өлкөлөр арасында хаос, туруктуулукту жок кылуу жана ишенимсиздикти жаратууга аракет кылган элементтер тарабынан жасалганын» белгиледи.
Министрлик Кытай жана Тажикстан элдерине көңүл айтты жана бул окуя боюнча күнөөлүүлөрдү аныктоо үчүн эки өлкөнүн бийлиги менен кызматташууга жана маалымат алмашууга даяр экенин билдирди.
Тажикстандын президенти Эмомали Рахмон 1-декабрда өлкөнүн күч структураларынын жетекчилери менен жумушчу жыйын өткөрүп, чек арада афган жарандары тарабынан жасалган мыйзамсыз жана провокациялык аракеттерди кескин айыптап, жооптуу адамдарга мындай окуялардын кайталанбашы үчүн зарыл чараларды көрүүнү тапшырды.
