Медиа маалыматына ылайык, шаар үстүндө төмөн бийиктикте учуп жаткан учактар байкалган, ошондой эле кеминде бир түтүндөгөн объекти байкалган. Каракастын түштүк бөлүгүндө, ири аскердик базага жакын жерде, электр энергиясы өчүп калды. Associated Pressтин маалыматына ылайык, кеминде жети жарылуу катталган. Венесуэланын расмий өкүлдөрү азырынча болгон окуяга комментарий беришкен жок.
CNNдин маалыматына ылайык, биринчи жарылуу жергиликтүү убакыт боюнча саат 01:50дө (Бишкек боюнча 11:50) болду. "Жарылуулардан улам терезелер дүүлүгүп кетти", - деп билдирди корреспондент Осмарри Эрнандес.
Ошондой эле CBS Newsтун журналисси Дженнифер Джейкобс, америкалык өкмөттүн булактарына таянып, АКШнын президенти Дональд Трамп Венесуэладагы объектилерге, анын ичинде аскердик жайларга сокку ургула деп буйрук бергенин маалымдады. Бирок бул маалымат азырынча Пентагондун жана Ак үйдүн расмий өкүлдөрү тарабынан тастыкталган жок.
Венесуэла АКШны агрессияда айыптады. Бул тууралуу өлкөнүн тышкы иштер министри Иван Хиль билдирүү жасады.
"Бул чабуулдун максаты Венесуэланын стратегиялык ресурстарын, анын ичинде мунай жана пайдалы казыналарды ээлеп алуу, ошондой эле өлкөнүн саясий көз карандысыздыгын күч менен бузууга аракет кылуу. Аларга бул ишке ашпайт", - деп айтылат расмий билдирүүдө.
Өлкөдө өзгөчө абал киргизилди.
Мурда Дональд Трамп Николас Мадуро режимине басым көрсөтүү максатында Венесуэлада аскердик операция өткөрүү мүмкүнчүлүгү тууралуу бир нече жолу билдирген.
