Тергөөнүн жыйынтыгы боюнча, кылмыштуу топ унаа айдоочулук курстарды өткөндүгүн тастыктаган жасалма документтерди даярдоо менен алектенген. Шектүүлөрдүн арасында "Ж. Ж. А." авто мектебинин директору М. А. жана "Ж. А." авто мектебинин Б. Т. бар. Тергөөнүн версиясы боюнча, алар арачы И. Т. аркылуу Кыргызстандан тышкары турган жарандардан электрондук капчыктарга 40тан 120 миң сомго чейин акча алышкан. Ошол эле учурда, окуу курстарын өткөндүгү тууралуу документтер шектүүлөрдүн фактикалык катышуусуз даярдалган.
Укук коргоо органдарынын маалыматы боюнча, авто мектептерге бир арачы аркылуу 244 тыңдаучу кабыл алынган, бул топко 2 млн 760 миң 850 сом киреше алып келген. Текшерүү учурунда 200 эсеп журналы, 160 курсту өткөндүгү тууралуу күбөлүк, 264 башка документ, сегиз электрондук маалымат сактоочу жана 40 патрону бар аңчылык мылтыгы алынган. Бул предметтер иш боюнча материалдык далилдер катары таанылды.
Кармалган И. Т., М. А. жана Б. Т. боюнча Кыргыз Республикасынын Кылмыш кодексинин 379-беренеси "Документтерди жасалмалоо" боюнча кылмыш иши козголуп, алар камакка алынды.
Тергөө уланууда.
