Келгендер Болатханын ден соолук абалы тууралуу маалымат алышып, тез арада сакайып кетишин каалашты.
Жолугушуу учурунда мэр жана министр ата-энелер менен агрессивдүү жүрүм-турумду азайтууга жана келечекте ушундай окуяларды алдын алууга багытталган жыйын өткөрүүнүн зарылдыгын талкуулашты. Ошондой эле, мектептердеги коопсуздук чараларын күчөтүү жана видеокөзөмөл системасын жакшыртуу боюнча макулдашышты.
Айбек Джунушалиев белгилегендей, 2025-жылы мэрия борбордук мектептерде видеокөзөмөлдү орнотуу жана модернизациялоо үчүн 160 миллион сом бөлөт.
Эскерте кетсек, 16-февралда №83 мектепте окуучу менен мугалимдин ортосунда конфликт болуп, ал физикалык зомбулукка айланган. Ички иштер министрлигинин маалыматы боюнча, окуя болгон жерге укук коргоо органдары келген. Конфликтке катышкан тараптар мугалим К.Б., 1957-жылы туулган, жана 10-класстын окуучусу М.К., 2010-жылы туулган, болуп аныкталган.
Мугалим окуучуга каршы чара көрүүнү өтүнүп арыз жазган, ал эми жашы жете элек окуучу медициналык жардамга кайрылган.
