Бишкекте 13-ноябрда Кыргыз-Япон адам ресурстарын өнүктүрүү борбору (KRJC) менен Канадзава университети (Kanazawa University) ортосунда өз ара түшүнүшүү меморандуму (MOU) кол коюлду.
JICAнын маалыматына ылайык, бул иш-чаранын алкагында KRJCде Канадзава университетинин офиси салтанаттуу түрдө ачылды.
Офистин түзүлүшүнүн максаты — япон университеттери менен Борбордук Азиядагы мекемелер ортосунда академиялык алмашууларды колдоо, ошондой эле экология, медицина, технология жана туризм тармактарында биргелешкен илимий изилдөөлөрдү жана билим берүү долбоорлорун колдоо. Офис ошондой эле Кыргызстан жана коңшу өлкөлөрдөн жаш илимпоздорго жана студенттерге жардам көрсөтөт.
Маанилүү милдеттердин бири — Японияны Борбордук Азия менен байланыштырган эл аралык академиялык тармакты түзүү. «Бул демилге ири изилдөө жана билим берүү программаларын иштеп чыгууга, эл аралык гранттарга жана SATREPS долбоорлоруна катышууга, ошондой эле биргелешкен стажировкаларды жана семинарларды уюштурууга мүмкүнчүлүк берет», - деп айтылат билдирүүдө.
Иш-чара Кыргыз-Япон адам ресурстарын өнүктүрүү борбору (KRJC) жана Канадзава университети (Kanazawa University) тарабынан Япон эл аралык кызматташтык агенттигинин (JICA) жана Жусуп Баласагын атындагы Кыргыз улуттук университетинин колдоосу менен уюштурулду. ```
