Милициянын маалыматына ылайык, 22-декабрда эртең менен, саат 07:50 чамасында, Сокулук райондук Ички иштер бөлүмүнө «Төрт-Көл» балдар бакчасында өрт чыккандыгы тууралуу маалымат келип түшкөн. Окуя катталып, окуя болгон жерге тергөө-оперативдик топ жөнөтүлгөн.
Текшерүүнүн жүрүшүндө балдар бакчасы 2023-жылдын 20-декабрында ишин баштаганы аныкталган. Алдын ала маалыматтарга ылайык, түштүк тараптагы чатырдан түтүн чыккан.
Өрт учурунда мекемеде болжол менен 20 бала жана 10 кызматкер болгон, алар тез арада эвакуацияланган. Ошондой эле, бир бөлүк мебель сыртка чыгарылган. Бактыга жараша, эч ким жабыркаган жок.
Окуя болгон жерде Сокулук районунан келген ӨКМ бригадасы иш алып барган. Өрт өчүрүүчүлөр тез арада өрттү өчүрүшкөн.
Өрттүн келип чыгуу себептерин аныктоо үчүн зарыл экспертизалар дайындалган. Текшерүү уланууда, анын жыйынтыгы боюнча процессуалдык чечим кабыл алынат.
