Чүй облусунун Ички иштер башкармалыгынын маалымат кызматынын билдирүүсүнө караганда, 30-ноябрда Ысык-Ата районунун ички иштер бөлүмүнө Нурманбет айылдык аймагында жайгашкан Красная Речка айылында Жогорку Кеңештин депутаттыгына талапкер болгон адам жергиликтүү тургундарга азык-түлүк таратып жатканы тууралуу маалымат келип түшкөн.
Бул факт катталган соң текшерүү башталды, анын алкагында окуя болгон жерге тергөө-оперативдик топ жөнөтүлдү. Текшерүүнүн жүрүшүндө азык-түлүктөр бул айылдын муктаж тургундарына жардам берүүчү фонд тарабынан берилгени аныкталды. Мындан тышкары, мындай жеткирүүлөр ар бир айдын аягында, көбүнчө дем алыш күндөрү жүргүзүлүп, андан кийин азык-түлүктөр муктаж тургундар арасында бөлүштүрүлөт. Бул процесс Ысык-Ата районунда гана эмес, өлкөнүн бардык аймактарында жүрүп жатат.
Текшерүү уланууда, анын жыйынтыгы боюнча учурдагы мыйзамдарга ылайык чечим кабыл алынат.
