Ысык-Ата районунда жаңы терини иштетүү заводу курулмакчы. Министрлер кабинетинин орун басары жана суу ресурстары, айыл чарба жана кайра иштетүү өнөр жайы министри Бакыт Торобаев бул тууралуу Биринчи радиодо түз эфирде билдирди.
Министр 100 гектар жер участогунун мурда жеке менчикте болуп, колдонулбай турганын, мамлекеттик менчикке өткөрүлүп, «Агрохолдингге» бекитилгенин айтты. Бул долбоор Кыргыз Республикасынын президентинин көрсөтмөсү боюнча ишке ашырылууда.
Торобаев ошондой эле бул аймакта суу менен камсыздоо, электр энергиясы жана канализация сыяктуу коммуникациялардын орнотулганын белгиледи. Жакын арада жүн, терини жана мал чарбачылыгы продукцияларын кайра иштетүү менен алектенген ишкерлер өндүрүштүк жайларды ижарага ала алышат.
Терини иштетүү заводу курулушунун аякташы болжол менен 1,5 жылды алат. Бул долбоордун ишке ашырылышы кайра иштетүү тармагын өнүктүрүүгө, жаңы жумуш орундарын түзүүгө жана мал чарбачылыгы товарларынын кошумча наркын жогорулатууга жардам берет.
