Мерекеге региондун ар кандай райондорунан 200гө жакын бала чогулду. Чакырылган коноктордун арасында окуудагы мыктылар, ошондой эле көп балалуу жана муктаж үй-бүлөлөрдүн балдары болду.
Облус башчысы Аманкан Кенжебаев бардык катышуучуларды келе жаткан Жаңы жыл менен куттуктукту. «Бүгүн биз жаңы жылдык шыршаны өткөрүп жатабыз. Ош облусунун жети районунан балдар бул иш-чарага чакырылды, аларды көңүл ачуучу программа жана белектер күтүп турат. Иш-чаранын негизги максаты — балдарга жаңы жылдык маанай тартуулоо. Жаңы жылы аларга көп ийгиликтерди жана урматтуу уул-кыздар болуп өсүүнү каалайм», — деди А. Кенжебаев.
Мерекенин алкагында балдар үчүн театралдаштырылган көрсөтүүлөр, бий номерлери жана ырлар даярдалды, ал эми ар бир катышуучуга Ош облусунун башчысынын атынан белектер тапшырылды.
