Маалыматка ылайык, 29-декабрдан 30-декабрга караган түнү, Орозбек Көккөзов атындагы жалпы дарыгерлик практика борборунда иштеген Эдил Үсөнов [Усенов] эки уулу менен бирге унаада болгон. Алар Баетов–Макмал автожолунда, Чолок-Кайын жана Баетов айылдарынын ортосунда, жолго күтүүсүздөн карышкыр чыгып калган учурда жүрүшкөн.
Дарыгердин айтымында, анын унаасында мылтык болгон, анткени ал аңчылыкка кызыгат. «Мен уулдарым менен айылдан келе жаткам, унаамда мылтык бар эле. Аңчылык — бул менин хоббиим. Ак-Чий айылынан өтүп, Чон-Шор жергесинде бир карышкыр жолду кесип өтүп, жонго бара жатканын байкадым. Мен унааны токтотуп, атып жибердим. Карышкыр бизден качууга аракет кылган жок», - деди Усенов.
